കഴിഞ്ഞ ഓണത്തിന് 'സെന്‍ട്രല്‍ ജയില്‍', ഈ ഓണത്തിന് സബ് ജയില്‍

വല്ലാത്തൊരു അറംപറ്റലിന്റെ കാലമാണിത് നടൻ ദിലീപിന്. നടി ആക്രമിക്കപ്പെട്ട കേസിൽ അറസ്റ്റിലായതിന് പിറകെ തൊട്ടതെല്ലാം പിഴയ്ക്കുന്ന അവസ്ഥയിലാണ് മാസങ്ങൾക്ക് മുൻപ് വരെ മലയാള സിനിമ അടക്കിവാണ സൂപ്പർസ്റ്റാർ. പഴയ ചിത്രങ്ങളും അതിലെ രംഗങ്ങളും ഡയലോഗുകളുമെല്ലാം ഓരോന്നായി തിരിച്ചടിച്ചുകൊണ്ടിരിക്കുകയാണ് ഇപ്പോൾ ദിലീപിനെ. സൂപ്പർ, മെഗാ സ്റ്റാറുകളും പുതുതലമുറക്കാരും ഒരുപോലെ ഓണം റിലീസിന്റെ ഒരുക്കത്തിൽ കഴിയുമ്പോൾ ജയിലിൽ ഓണമുണ്ണാൻ ഒരുങ്ങുകയാണ് ഇപ്പോൾ ജയിലിൽ അഴിയെണ്ണുന്ന പഴയ ജനപ്രിയ നായകൻ. ഹൈക്കോടതി ജാമ്യം നിഷേധിച്ചു. ഇനി ഓണത്തിന് മുൻപ് സുപ്രീം കോടതിയിൽ നിന്ന് ജാമ്യം തരപ്പെടുത്താനുള്ള സാധ്യത കുറവാണെന്ന് നിയമവിദഗ്ദ്ധർ പറയുന്നു. ഇതുവരെയുള്ള ഒട്ടുമിക്ക ഓണക്കാലത്തും ദിലീപിന് പുത്തൻ റിലീസുകൾ ഉണ്ടായിരുന്നു. ഇതിൽ ഭൂരിഭാഗവും ബോക്സ് ഓഫീസിൽ വൻ ഓളങ്ങൾ ഉണ്ടാക്കുകയും ചെയ്തിട്ടുണ്ട്. എന്നാൽ, കഴിഞ്ഞ ഓണത്തിന് ഇറങ്ങിയ ചിത്രം എല്ലാ അർഥത്തിലും അറംപറ്റലായിരിക്കുകയാണ് ദിലീപിന്. അറസ്റ്റിനുശേഷം ട്രോളുകാർ കൊണ്ടാടുന്ന, സുന്ദർദാസിന്റെ വെൽക്കം ടു സെൻട്രൽ ജയിൽ ആയിരുന്നു കഴിഞ്ഞ വർഷത്തെ ദിലീപിന്റെ ഓണച്ചിത്രം. മോഹൻലാലിന്റെ ഒപ്പം, പൃഥ്വിരാജിന്റെ ഊഴം, കുഞ്ചാക്കോ ബോബന്റെ കൊച്ചൗവ്വ പൗലോ എന്നിവയോട് മത്സരിച്ച; സപ്തംബർ പത്തിന് ഇറങ്ങിയ ചിത്രം. ചിത്രം ബോക്സ് ഓഫീസിൽ വലിയ ചലനം ഉണ്ടാക്കിയില്ലെങ്കിലും അതിന്റെ തുടർചലനം ഇപ്പോൾ അനുഭവിക്കുകയാണ് ദിലീപ്. അറംപറ്റിയ പോലെ ഒരു വർഷത്തിനുശേഷമുള്ള മറ്റൊരു ഓണക്കാലത്ത് ശരിക്കും ജയിൽ വാസം അനുഭവിക്കുകയാണ്ദിലീപ്. ആലുവ സബ് ജയിലിലെ റിമാൻഡ് അമ്പത് ദിവസം പൂർത്തിയാക്കിയ ദിലീപിന്റെ ഇത്തവണത്തെ ഓണംആലുവ സബ് ജയിലിലാവും. ജയിൽവാസവുമായി ബന്ധപ്പെട്ട് ദിലീപ് നേരിടുന്ന മറ്റൊരു പരിഹാസം ദേ മാവേലി കൊമ്പത്ത് എന്ന ആക്ഷേപഹാസ്യ പാരഡി ഗാനത്തിന്റേതാണ്. വൻഹിറ്റായ ഈ സി.ഡി ഈ ഓണക്കാലത്ത് ഇറങ്ങുന്നില്ല എന്നാണ് വാർത്ത. ജയിലിൽ നിന്നുള്ള ദിലീപിന്റെ റിലീസും സി.ഡി.യുടെ റിലീസുമായ ബന്ധപ്പെടുത്തിക്കൊണ്ടുള്ള ട്രോളുകൾക്ക് യാതൊരു പഞ്ഞവുമില്ല. കഴിഞ്ഞ കുറച്ചുനാളുകളായി നിർമാണവും വിതരണവും പ്രദർശനവും ഉൾപ്പടെ മലയാള സിനിമാ വ്യവസായം അടക്കിവാണ ദിലീപ് ജയിലിൽ കഴിയുമ്പോൾ മറ്റ് നടന്മാരുടെ ചിത്രങ്ങൾഓണക്കാലം കൊഴുപ്പിക്കാൻറിലീസിന് ഒരുങ്ങിയിരിക്കുകയാണ്. മോഹൻലാലിന്റെ വെളിപാടിന്റെ പുസ്തകം, മമ്മൂട്ടിയുടെ പുള്ളിക്കാരൻ സ്റ്റാറാ, ദുൽഖറിന്റെ സോലോ, നിവിൻ പോളിയുടെ ഞണ്ടുകളുടെ നാട്ടിൽ എന്നിവയാണ് ഓണം റിലീസായി തിയേറ്ററിൽ എത്തുന്ന ചിത്രങ്ങൾ. ദിലീപ് അറസ്റ്റിലാവുന്നതിന് മുൻപ് ചിത്രീകരണം പൂർത്തിയായ അരുൺ ഗോപിയുടെ ചിത്രമായ രാമലീല ഈ ഓണനാളിലും തിയേറ്ററിലെത്തുന്നില്ല. ചിത്രം അടുത്ത മാസം റിലീസ് ചെയ്യുമെന്നാണ് നിർമാതാത് ടോമിച്ചൽ മുളകുപാടം പറയുന്നത്. എന്നാൽ, റിലീസ് തിയ്യതിയൊന്നും നിശ്ചയിച്ചിട്ടില്ലെന്ന് അദ്ദേഹം പറഞ്ഞു. അറസ്റ്റിന് മുൻപ് ദിലീപ് അഭിനയിച്ചുകൊണ്ടിരുന്ന പ്രൊഫസർ ഡിങ്കൻ, കമ്മാരസംഭവം എന്നിവയുടെ കാര്യം ഇപ്പോഴും അനിശ്ചിതാവസ്ഥയിലാണ്.

from movies and music rss http://ift.tt/2xJEgxA
via IFTTT