സീമ പറയുന്നു; ഇനിയാരും പറഞ്ഞേക്കല്ലേ ഞങ്ങള്‍ പിരിയാന്‍ പോകുന്നെന്ന്!

1980 ഓഗസ്ത് 28. കോഴിക്കോടിന്റെ മണ്ണിൽ വിരിഞ്ഞ പ്രണയത്തിനൊടുവിൽ സംവിധായകൻ ഐ വി ശശിയും നടി സീമയും വിവാഹിതരായത് അന്നാണ്. 37 വർഷങ്ങൾക്കിപ്പുറം അങ്ങനെയൊരു ഓഗസ്റ്റ് 28ന് കോഴിക്കോട്ടേക്ക് എത്തിയ അവർക്കായി ഒരു സർപ്രൈസ് കാത്തിരിപ്പുണ്ടായിരുന്നു,തീരെപ്രതീക്ഷിക്കാത്ത ഒരു വിവാഹവാർഷിക ആഘോഷം! ഗൃഹലക്ഷ്മി പ്രൊഡക്ഷൻസിന്റെ ബാനറിൽ ഐവി ശശിയുടെ നിരവധി ചിത്രങ്ങൾ നിർമ്മിച്ച ചലച്ചിത്ര നിർമ്മാതാവും മാതൃഭൂമി ഡയറക്ടറുമായ പി.വി.ഗംഗാധരന്റെ വീട്ടിലാണ് ഐ.വി.ശശിയുടെയും സീമയുടെയും വിവാഹവാർഷികാഘോഷം നടന്നത്. ഒരു പരിപാടിയിൽ പങ്കെടുക്കാൻ കോഴിക്കോട്ട് എത്തിയ ഇരുവരെയും പി.വി.ഗംഗാധരൻ വീട്ടിലേക്ക് ക്ഷണിച്ചപ്പോൾ വെറുമൊരു സൗഹൃദസന്ദർശനമെന്നേ ദമ്പതികൾ കരുതിയുള്ളു. അവിടെ എത്തിയപ്പോഴാണറിയുന്നത് സദ്യയും പായസവുമൊക്കെയായി തങ്ങളുടെ വിവാഹവാർഷികദിനം ആഘോഷമാകാൻ പോവുകയാണെന്ന്. ആഘോഷങ്ങൾക്കിടെ പരസ്പരം പൂമാലയണിയിച്ച് സീമയും ഐവി ശശിയും ആ പഴയ വധൂവരന്മാരായി. ഒരുമിച്ച് കേക്ക് മുറിച്ചും സന്തോഷം പങ്കുവച്ചു. തന്റെ സിനിമയിൽ അഭിനയിക്കാൻ വന്ന തന്റേടിയായ ഡാൻസുകാരിപ്പെണ്ണ് പിന്നെ തന്റെ സിനിമയിലും ജീവിതത്തിലും നായികയായത് ഓർത്തപ്പോൾ ഐ വി ശശിക്ക് ആ പഴയ കാമുകന്റെ ചെറുപ്പം. തന്നെ പ്രണയിച്ചത് ശശിയേട്ടന്റെ കഷ്ടകാലമെന്ന് പറഞ്ഞ് ചിരിച്ച് പഴയ കിലുക്കാംപെട്ടി പെണ്ണായി സീമയും മാറി. സീമയും ഐ.വി.ശശിയും പിരിയാൻ പോവുന്നു എന്ന ഗോസിപ് വാർത്തയുടെ പിറകേ ഇനിയാരും പോവിലല്ലോ എന്ന് സീമയുടെ കുസൃതി നിറഞ്ഞ ചോദ്യവും ഇടയ്ക്കുണ്ടായി. രണ്ട് മാസം മുമ്പാണ് ഇരുവരും വിവാഹമോചിതരാകാൻ പോവുന്നു എന്ന് അഭ്യൂഹങ്ങൾ പരന്നത്. സൗഹൃദവും സന്തോഷവും പങ്കുവച്ച് എല്ലാവർക്കും ഓണാശംസകളും നേർന്നാണ് സീമയും ഐവി ശശിയും മടങ്ങിയത്.

from movies and music rss http://ift.tt/2vxSvow
via IFTTT