അമ്മയുടെ കൈ പിടിച്ച് സൂപ്പര്‍സ്റ്റാറാവാന്‍ വരികയാണ് ഈ ഏഴു മാസക്കാരന്‍

അച്ഛനമ്മമാരുടെ പാതയിൽ അഭിനയരംഗത്തേയ്ക്കു വരാത്തവർ മാത്രമാണ് ബോളിവുഡിൽ വാർത്തയാകുന്നത്. താരസന്തതികളിൽ ഭൂരിഭാഗം പേരും പിൽക്കാലത്ത് താരങ്ങളായി മാറിയതാണ് ബോളിവുഡിന്റെ ചരിത്രം. കരീനയുടെയും സെയ്ഫ് അലി ഖാന്റെയും മകൻ തൈമുറും ഒരുകാലത്ത് അഭിഷേക് ബച്ചനെയും സഞ്ജയ് ദത്തിനെയും സണ്ണി ഡിയോളിനെയുമെല്ലാം പോലെ താരമാകുമെന്ന കാര്യത്തിൽ രണ്ടഭിപ്രായമില്ല. അഭിഷേകും സണ്ണിയുമെല്ലാം വലുതായശേഷമാണ് താരങ്ങളായി മാറിയതെങ്കിൽ അങ്ങിനെ കാത്തുനിൽക്കാനൊന്നും തൈമുറിന് ക്ഷമയില്ല. ഏഴാം മാസത്തിൽ തന്നെ വെള്ളിത്തിരയിൽ അരങ്ങേറ്റം കുറിക്കാനൊരുങ്ങുകയാണ് തൈമുർ. പ്രസവശേഷമുള്ള അമ്മ കരീനയുടെ തിരിച്ചുവരവ് ചിത്രമായ വീരെ ദി വെഡ്ഡിങ്ങിലാണ് കുഞ്ഞു തൈമുറും തല കാണിക്കുന്നത്. ഒരു സീനിൽ പേരിനൊന്ന് വന്നു പോവുന്നേയുള്ളൂ തൈമുർ എന്നാണ് പുറത്തുവരുന്ന വിവരം. കരീന ഗർഭിണിയായതിനെ തുടർന്ന് ചിത്രത്തിന്റെ തിരക്കഥയിൽ കാര്യമായ മാറ്റങ്ങൾ വരുത്തിയതായി നേരത്തെ റിപ്പോർട്ടുകൾ ഉണ്ടായിരുന്നു. ഗർഭിണിയായ കരീനയുടെ ദൃശ്യങ്ങളും ഇതിനുവേണ്ടി പകർത്തിയിരുന്നു. അതുകൊണ്ടാണ് ഇപ്പോൾ കുഞ്ഞിനെയും ചിത്രത്തിൽ ഉൾപ്പെടുത്തേണ്ടിവന്നത്. ഇതോടെ കരീനയ്ക്ക് പുറമെ സോനം കപൂറും സ്വര ഭാസ്ക്കറും ശിഖ തൽസാനിയയും അണിനിരക്കുന്ന ചിത്രത്തിലെ പ്രധാന ആകർഷണം തൈമുറായിരിക്കുമെന്ന് ഉറപ്പായി. അനിൽ കപൂറിന്റെ മകളായ റിയ കപൂറാണ് ചിത്രം നിർമിക്കുന്നത്. ശശാങ്ക് ഘോഷാണ് ചിത്രം സംവിധാനം ചെയ്യുന്നത്. കഴിഞ്ഞ വർഷം ഡിസംബർ ഇരുപതിന് ജനിച്ചത് മുതൽ വാർത്തകളിൽ നിറഞ്ഞുനിൽക്കുകയാണ് തൈമുർ. ആദ്യം പേരിനെ ചൊല്ലിയുള്ള തർക്കമായിരുന്നു. പിന്നീട് സെലിബ്രിറ്റികളായ അച്ഛനും അമ്മയ്ക്കുമൊപ്പമുള്ള ഓരോ യാത്രയും അതിന്റെ ഓരോ ചിത്രവും വലിയ വാർത്തകളായി മാധ്യമങ്ങൾ ആഘോഷിച്ചു.

from movies and music rss http://ift.tt/2wg5LPZ
via IFTTT