തീവണ്ടികളില്‍ വീണ്ടും സിനിമാ ഷൂട്ടിങ്

കണ്ണൂർ: കോവിഡ് കാലത്ത് പായ്ക്കപ്പ് ചെയ്ത തീവണ്ടിയിലെ സിനിമാ ഷൂട്ടിങ്ങിന് വീണ്ടും ക്ലാപ്പടിച്ചു. കോവിഡ് വ്യാപനത്തിന്റെ തോത് കുറഞ്ഞതോടെ തീവണ്ടിയിലും റെയിൽവേ സ്റ്റേഷനുകളിലും സിനിമാക്കാർ എത്തിത്തുടങ്ങി. പാതിനിർത്തി ബാക്കിയായ ഷോട്ടുകൾ പൂർത്തീകരിക്കാനും ലൊക്കേഷൻ മാനേജർമാർ റെയിൽവേയെ സമീപിച്ചു. യാത്രാതടസ്സം വരാത്തരീതിയിൽ റെയിൽവേ ഇപ്പോൾ ഷൂട്ടിങ് അനുവദിക്കുന്നുണ്ട്. പാലക്കാട് ഡിവിഷനിൽ മൂന്ന് സിനിമകളാണ് ഈ വർഷം ഷൂട്ട് ചെയ്തത്. വിനീത് ശ്രീനിവാസൻ സംവിധാനം ചെയ്യുന്ന ഹൃദയംഎന്ന സിനിമയുടെ ചില ഭാഗങ്ങൾ പാലക്കാടും മുതലമടയിലും ചിത്രീകരിച്ചു. പ്രണവ് മോഹൻലാലും കല്യാണി പ്രയദർശനുമാണ് പ്രധാന താരങ്ങൾ. ബി. ഉണ്ണിക്കൃഷ്ണൻ മോഹൻലാലിനെ നായകനാക്കി ഒരുക്കുന്ന ആറാട്ടിന്റെ ഭാഗങ്ങൾ പാലക്കാട് ടൗണിൽ ചിത്രീകരിച്ചു. വാളയാറിൽ ഫെബ്രുവരിയിൽ ചിത്രീകരിച്ച തമിഴ് സിനിമയുടെ ക്ലൈമാക്സ് ഏപ്രിലിൽ ചിത്രീകരിക്കും. മനോജ് ബീഥയാണ് സംവിധാനം. കോവിഡ് വ്യാപനം കുറഞ്ഞതിനുശേഷം തിരുവനന്തപുരം ഡിവിഷനിൽ രണ്ട് സിനിമാ ഷൂട്ടിങ്ങാണ് നടന്നത്. കെ.എസ്.എഫ്.ഡി.സി.യുടെ ചെറുചിത്രമാണ് ആലുവയിലും പരിസരത്തും ചിത്രീകരിച്ചത്. കൊല്ലത്തും റെയിൽവേ അധീനതയിലുള്ള മൺറോതുരുത്തിലും ചിത്രീകരണം നടന്നു. തൃശ്ശൂർ-ഗുരുവായൂർ, എറണാകുളം-കൊല്ലം സെക്ഷനുകളിലാണ് കൂടുതലും ഷൂട്ടിങ് അനുവദിക്കുന്നത്. ഈ റൂട്ടിൽ തീവണ്ടി ഓട്ടം കുറവാണ്. ഇപ്പോൾ തീവണ്ടി ഓട്ടമില്ലാത്ത കൊച്ചിൻ ഹാർബർ ടെർമിനസിനും ആവശ്യക്കാർ ഏറെയാണ്. മേക്ക് ഓവറിൽ സ്റ്റേഷനുകൾ മമ്മൂട്ടി സിനിമ ഉണ്ടയിൽ ഛത്തീസ്ഗഢിലെ ദുർഗ ജങ്ഷൻ റെയിൽവേ സ്റ്റേഷനായി മാറിയ നിലമ്പൂർ റെയിൽവേ സ്റ്റേഷനും ആവശ്യക്കാർ ഏറെയാണ്. മുതലമടയും അങ്ങാടിപ്പുറവും നിരവധി സിനിമകളിലെത്തി. നിരവധി സ്റ്റേഷനുകളാണ് മറുനാടൻ ഗ്രാമീണ സ്റ്റേഷനായി വേഷം മാറിയത്. മഞ്ജു വാര്യർ ലാൽ ഫാനായി അഭിനയിച്ച മോഹൻലാൽ സിനിമയുടെ ചില ഭാഗങ്ങൾ ഗുരുവായൂർ റെയിൽവേ സ്റ്റേഷനിലാണ് ഷൂട്ട് ചെയ്തത്. റോഷൻ ആൻഡ്രൂസ് സംവിധാനം ചെയ്ത പ്രതി പൂവൻകോഴിയുടെ ചില സീനുകൾ കോട്ടയത്ത് ചിത്രീകരിച്ചു. റെയിൽവേയ്ക്കും വരുമാനം സിനിമാ ചിത്രീകരണത്തിന് അനുമതി നൽകുകവഴി റെയിൽവേയ്ക്കും നല്ല വരുമാനമാണ് ലഭിക്കുന്നത്. ചെറിയ സ്റ്റേഷനുകൾക്ക് 25,000 രൂപയാണ് ഒരു ദിവസ വാടക. തീവണ്ടി വേണമെങ്കിൽ അഞ്ചുലക്ഷം രൂപ അടയ്ക്കണം. യാത്രാവണ്ടികൾക്ക് പുറമെ ചരക്കുവണ്ടികളും ഷൂട്ടിങ്ങിന് നൽകുന്നുണ്ട്.

from movies and music rss https://ift.tt/3sz464a
via IFTTT